أقصر وأسهل طرق لتحقيق السعاده للزوجات والمراهقات !

0
779

الجو النهاردة جميل جدا على فكرة …
وبصفتي ست تجاوزت التلاتين من العمر بكام سنة كنت بفكر في جملة كانت جدتي دايما بتقولهالي
“كل مكسب وراه مهلك”
الجملة دي حلوة اوي لما بفكر فيها بفهم حاجات كتير في الدنيا…….
لما بتكوني بنت لسة ماتجوزتيش المعادلة اللي بتبقي عايشة بيها
نفسي وطموحي الشخصي+ أسرتي (بابا ماما اخواتي)

معادلة تحقيقها سهل
اتعلمي..اقري…اخرجي شوفي الدنيا واعرفيها…انبسطي …خليكي بالنضج اللي يفهمك ازاي تختاري ويخليكي تتحملي مسؤولية اختيارك عشان تقدري على تكوين أسرة حلوة وعشان تقدري تتعاملي لو الرياح أتت بما لا تشتهي السفن
اختاري كارير ولو ماعجبكيش غيريه وجربي لحد ما تحققي طموحك…بس المهم بكون طموحك انتي …طموحك الشخصي مش طموح حد بتقلديه منغير تفكير…ومش طموح حد عاوزهولك وشايف انه الانسبلك…
لما تتجوزي…
ما ينفعش تكوني نفس البنت ولا ينفع تطبقي نفس المعادلة
لان في ناس بقى ليهم عليكي حقوق
أولهم نفسك…تاني أولهم نفسك…وزوج وأولاد …
لو عاوزة تشتغلي اشتغلي شغل يتناسب مع المعادلة دي
نفسك وطموح شخصي+ زوج+ اولاد +طموحك في اولادك
لان الست لما بيبقى عندها اولاد بيبقى جزء كبير من طموحها فيهم هما …اتعاملي مع كل طرف في المعادلة دي بشكل ما يتسببش في خلل فيها وهو ده اجتهادنا في الدنيا معادلة السعادة اللي هي اكيد في الحقيقة نسبية جدا جدا
كيفي طموحك الشخصي بالشكل اللي ما يخلكيش تفقدي السعادة
وهل ممكن إن الطموح الشخصي والسعي ليه يبقى مصدر تعاسة؟
اكيد لما علاقتك مع جوزك وأولادك تبوظ ببعدك الدايم وانشغالك المستمر وتبقي مش شايفة غير طموحك مش هتبقى في النهاية سعيدة أو تبقي متخيلة إنك عشان بتوفري “ضروريات” مادية انك كده بتحققي السعادة ده مش دورك في الاساس…مش دورك كل يوم تبقي في “هلك” وتلفي في ساقية وتتعاملي مع ناس “متآمرة” اه دي حقيقة احنا كشعب المصري في الشغل وداوير العلاقات في الشغل بنتحول لمتآمرين على بعض وكله بيتفنن ازاي يضايق التاني ويطلع عقده على التاني سيبك من موضوع روح الفريق ده دي حاجات بتتكتب في السي في بس”إلا من رحم ربي” هو مش كلنا بلا استثناء بنشير صورة احمد مظهر وهو بيقول “اوباش، أوغاد” .
فلما نبص للمعادلة هتلاقي إن الخلل هيبقى في بدايتها لانك كده بتيجي على نفسك…ومعاهم بتيجي على باقي الاطراف فيها…
في حلول …وفي حاجات تانية ممكن نعملها بس احنا دايما بنخاف نغير اللي اتعودنا عليه…لحد ما نلاقي نفسنا كبرنا
للطموح أشكال أخرى وكتيرة ماتحطهوش ف قالب
(ناجح في نظر الناس بس مش سعيد …
ولا سعيد بس فنظر الناس مش ناجح؟
لان السعادة أصلا نجاح سيبك منهم”
“كل مكسب وراه مهلك”
-المكسب المادي أرخص أنواع المكاسب
-والمهلك في الصحة والحب والاستقرار النفسي أغلى أنواع الخسارة
#وده مجرد رأي شخصي ناس كتير ممكن تختلف معاه..

اترك رد