تنويه هام للناس اللي عاوزه تيجي الامارات زياره للبحث عن عمل
الارزاق بيد الله وحده ولكن خذوا بالاسباب
قررت انك تيجي يبقي ع الاقل تعمل حسابك علي الاقل في
٨٠٠ درهم شهريا للسكن (٤.٨٥ × ٨٠٠ =٣٨٨٠ جنيه )
١٠٠٠ درهم شهريا اكل وموصلات ممكن تقل او تزيد (٤٨٥٠ جنيه )
٣٠٠ درهم سجاير واتصالات لو مش مدخن يبقي النص (١٢٨٠ جنيه )
احجز تذكرتك ذهاب وعوده ومتحجزش عوده وهميه علشان وقتها بتكون لبست نفسك الوهم لانه لا قدر الله لو ملقتش شغل او لازم تغيير فيزه هتضطر تحجز بمبلغ ازيد وانت الخسران
طيب ربنا اكرمك وهتعمل تعديل وضع بمنتهي الشياكه هتتصل بشركة الطيران تفتح تذكرتك ويبقي ليك فلوس عندهم رصيد تستخدمه خلال سنه ومش هتخسر اكتر من ١٥٠ درهم علي حسب حجزك
السكن
شوف اقرب سكن لمحطة مترو
الناس اللي بتستسهل وتنام في الجوامع والحدائق ممكن تعدي معاك ليله او ليلتين وتلاقي نفسك مقبوض عليك ومعمولك ابعاد من الدوله
الزيارة
لو انت ملكش معارف في الامارات يفضل انك تعملها عن طريق شركات الطيران زي فلاي دبي والعربيه وكمان الامارات
ليه ؟
علشان تتفادي النصابين بتوع الفيسبوك
تمن الزياره الشهر في المتوسط ٥٠٠ درهم (٢٤٠٠ جنيه )
ثمن الزياره ٣ شهور في المتوسط ١١٠٠ درهم (٥١٨٠ جنيه )
لو هتعملها من شركات الطيران هتبقي باقه علي بعضها بالرحله ذهاب وعوده وهتبقي اقل بس هتدفع تأمين مسترد
التأمين الصحي
حاول قد ما تقدر تشتري باقة التأمين اللي بتكون علي تذكرة الطيران وتمنها حوالي ٣٧ درهم لانه لا قدر الله وحصلك حاجه هنا هتدفع كتير
الزيارة نوعين
الاول زياره عائليه وليها شروط ان اللي يعملها لك قريب من الدرجه الاولي وله راتب كبير وبيقدم عقد سكن وبيدفع تأمين مسترد ودي مش منتشره قوي ومن فايدتها انهم مش بيطلبوا منك حجز فندق في المطار او يكون معاك ١٠٠٠ دولار وبيتم استخراجها مباشرة من الجوازات وغير مصرح لحاملها بالعمل وكمان سعرها اقل الشهر ب ٣٠٠ درهم وال ٣ شهور ب ٩٠٠ درهم
التاني الزيارة السياحيه بيتم استخراجها عن طريق شركات السياحه او الطيران ودي اللي منتشره بين الناس وزي ما قولنا يفضل انك لو ملكش حد في الامارات انك تتطلعها من مكتب شركات الطيران
غير مصرح لك بالعمل في معظم الاحيان بيطلبوا انهم يشوافوا معاك ١٠٠٠ دولار وحجز فندق وتذكرة ذهاب وعوده
التسول
لاحظنا انتشار حالات التسول من جنسيات كتيره هنا في الامارات والحكومه بتضرب بايد من حديد علي الظاهره دي لدرجة ان اللي بيتمسك بياخد ابعاد اداراي وبصمة عين
لاحظنا ايضا انتشار الظاهره دي من بعض المصريين لدرجة انك ممكن تقابل المتسول ده في اكتر من مكان يحكي لك الحكايه نفسها او فيلم جديد ووصلت انه فيه اسر اب وام واولادهم بيمارسوا الظاهره دي وجايين سياحه للغرض ده
التسول الالكتروني
الجاليه هنا ماشاء الله عندها كم من الصفحات والجروبات بعدد كبير لاحظنا انتشار رسايل وبوستات بتلطب مساعدات واتضح ان فيه ناس بقوا محترفين الشغلانه دي
الجديد انه ادمنز الصفحات والجروبات بقوا علي اتصال مع بعض وتم كشف حالات كتير شغلتها النصب
قانونا يمنع جمع اي مساعدات ماليه او عينيه الا برخصه من الجهات المختصه
نصايح عامه
-مفيش فيزة سياحه تمنها ٣٠ الف جنيه
-مفيش حاجه اسمها هتروح فيزة سياحه علي شغل وسكن اذا كان جاد ارخصله انه يعملك فيزة عمل من انه يعمل سياحه وبعدين يعدلك وضعك
-غادر قبل انتهاء الزياره ولو فيه صاحب شغل قالك خالف قوله وديني عمان وهاتني زياره تانيه لحد ما تعدل وضعك
-متستسهلش الغلط وتفتكر انك الوحيد الناصح وهتفلت منها البلد هنا نظامها واضح
-اخيرا استعمل عقلك ومتحطش نفسك في ازمه وخد بالاسباب وتوكل علي الله
-ارجوا ان كلامي يكون خفيف ولو فيه معلومه غلط اسعد بالتصحيح
-اتمني للجميع التوفيق
